ចាងហ្វាងកាសែតវាលឥន្ទ្រីត្រូវតុលាការឃុំខ្លួន ពាក់ព័ន្ធរឿងឆបោកប្រាក់
31-March-2016 | ដោយ មែន កំសត់
ភ្នំពេញ៖ ចៅក្រមសាលាដំបូងរាជធានីភ្នំពេញ នៅរសៀលថ្ងៃទី៣០ខែមីនាឆ្នាំ២០១៦ម្សិលមិញបានសម្រេចឃុំខ្លួន ចាងហ្វាងកាសែតវាលឥន្ទ្រីដែលយកឈ្មោះអ្នកធំទៅឆបោកប្រាក់ចំនួន៤ ម៉ឺនដុល្លារ។តុលាការឃុំខ្លួនដាក់ពន្ធនាគារនេះតាមអំណាចសាលក្រម ផ្តន្ទាទោសដាក់ពន្ធនាគារ១ឆ្នាំ៦ខែពីបទឆបោកប្រាក់ចំនួន៤ម៉ឺន ដុល្លាអាមេរិកតាមរូបភាពរត់ការយកអាជ្ញាប័ណ្ណដាក់ស្លាកចរាចរណ៍តាម ផ្លូវសាធារណៈ ។
ចាងហ្វាងកាសែតរូបនេះឈ្មោះជុង ហៃយ៉េន ភេទប្រុសអាយុ៤២ឆ្នាំដែលសមត្ថកិច្ចនគរបាលព្រហ្មទណ្ឌក្រសួងមហាផ្ទៃ ឃាត់ខ្លួនកាលពីថ្ងៃទី២៩ខែមីនាឆ្នាំ២០១៦តាមអំណាចសាលក្រមរបស់លោក ស្រីពេជ ម៉ារ៉ែន ចៅក្រមជំនុំជម្រះសាលាដំបូងរាជធានីភ្នំពេញដែលកំណត់ផ្តន្ទាទោសដាក់ ពន្ធនាគារ១ឆ្នាំ៦ខែ ពីបទឆបោក ។
ដើមចមដែលនាំឲ្យមាន ការផ្តន្ទាទោសនេះបានកើតឡើងកាលពីអំឡុងឆ្នាំ២០១១កន្លងទៅឈ្មោះជុង ហៃយ៉េនបានអះអាងប្រាប់ជនរងគ្រោះថាខ្លួនជាកូនចៅរបស់ឯកឧត្តមហ៊ីង ប៊ុនហៀង អគ្គមេបញ្ជាការរងកងយោពលខេមរភូមិន្ទ។ដើម្បីឲ្យជនរងគ្រោះមាន ការជឿជាក់ព្រមប្រគល់ប្រាក់ចំនួន៤ម៉ឺនដុល្លាអាមេរិករត់ការយក អាជ្ញាប័ណ្ណដាក់ស្លាកចរាចរណ៍តាមផ្លូវសាធារណៈ ។អស់រយៈពេលជាង២ឆ្នាំ ក្រោយមក ឈ្មោះ ជុង ហៃយ៉េនរត់ការមិនបានសម្រេចតាមការសន្យានោះទេហើយព្យាយាមគេចវេះ ថែមទៀតផង។ដូច្នេះហើយជនរងគ្រោះធ្វើការសាកសួរទើបដឹងថាពុំឮមែនជា កូនចៅរបស់ឯកឧត្តមហ៊ីង ប៊ុនហៀងទេ ទើបដាក់ពាក្យបណ្តឹងមកតុលាការដើម្បីចាត់ការតាមច្បាប់ ។
នៅ អំឡុងឆ្នាំ២០១៤ តុលាការបានបើកសវនាការជំនុំជម្រះ រួចចេញសាលក្រមសម្រេច ផ្តន្ទាទោសឈ្មោះ ជុងហៃយ៉េនដាក់ពន្ធនាគារ១ឆ្នាំ៦ខែ និង សងជនរងគ្រោះចំនួន៤ម៉ឺនដុល្លារព្រមទាំង ជំងឺចិត្តចំនួន១០លានរៀល ។ ក្នុងសាលក្រមនេះ ក៏បានសម្រេចបង្គាប់ឲ្យចាប់ខ្លួន ឈ្មោះ ជុង ហៃយ៉េន យកមកឃុំខ្លួននៅពន្ធនាគារ ដើម្បីអនុវត្ត តាមអំណាចសាលក្រមនេះ ។ ប៉ុន្តែ លោក ពុធ ធាវី មេធាវីការពារឲ្យឈ្មោះ ជុង ហៃយ៉េន បានប្តឹងឧទ្ធរណ៍ ប្រឆាំងនឹងសាលក្រមនេះ ៕
ចំនួនអ្នកទស្សនា
- ថ្ងៃនេះ6791
- ម្សិលមិញ12561
- សប្តាហ៍នេះ34741
- ខែនេះ56621
- ឆ្នាំនេះ56621
- សរុប20499077